Geguritan

WOLAK WALIKING JAMAN

Bareng tekan kala mangsane

Jebul

Ora gedhe rembulane

Ora jembar kalangane

Yagene

Tandure ora sumilir

Tandure ora ngalilir

Jalaran katrajang banjir

Kuning pucet kablebeg bledug polusi

Wong mbangun kreteg nyemprot ama ngrabuk pari

Bocah angon buyar bubar

Nglumpuk ing bale desa nyekel buku kanggo ulangan

Blimbinge digendhong menyang kutha

Diijolake lenga

Dodode bedhah dipotongi

Digawe klambi

Turahe dadi rok mini

Rapate mulur wektune

Rapate akeh usule

Surake digawe gawe

Hora hore hora hore

Hora

Bareng tekan kala mangsane

Jebul

Ora gedhe satekade

Ora jembar wawasane

Yagene

                       

Dening Sudi Yatmana

 

Anak Wedok Anak Lanang

 

Anak wedok

Apa kowe bisa nglangi

Inggih bapak kula cobi

Nglangi ana ngendi

Ing bebrayan ing sesami

 

Anak lanang

Apa kowe wani perang

Inggih ibu kula rancang

Perang ana ngendi

Ing nepsu dhiri pribadi

 

Anak wedok anak lanang

Lelorone dakgegadhang

Bisa lan wani ngupadi

Mrih ungguling jati dhiri

 

Anakanakku

Apa kowe nedya maju

Bapak ibu kula tuhu

Maju ing bab apa

Ajining gesang punika

 

                                   

Oleh Sudi Yatmana